ಅದಾನಿ ವಂಚನೆ , ನೊಟೀಸ್‌ಗೆ ಸಹಾಯ ಕೋರಿದ ಅಮೆರಿಕಾ

ಅಮೆರಿಕದ ನ್ಯಾಯಾಲಯದಲ್ಲಿ ದಾಖಲಾಗಿರುವ 750 ಮಿಲಿಯನ್ ಬಾಂಡ್ ವಂಚನೆ ಪ್ರಕರಣದಲ್ಲಿ ವಿಚಾರಣೆಗಾಗಿ ಅದಾನಿ ಗ್ರೂಪ್‌ನ ಇಬ್ಬರು ಹಿರಿಯ ಕಾರ್ಯನಿರ್ವಾಹಕರಿಗೆ ಕಾನೂನು ನೋಟಿಸ್ ಜಾರಿ ಮಾಡಲು ಸಹಾಯ ಮಾಡುವಂತೆ ಯುನೈಟೆಡ್ ಸ್ಟೇಟ್ಸ್ ಸೆಕ್ಯುರಿಟೀಸ್ ಮತ್ತು ಎಕ್ಸ್‌ಚೇಂಜ್ ಕಮಿಷನ್ ( ಎಸ್‌ಇಸಿ) ಭಾರತವನ್ನು ಕೇಳಿಕೊಂಡಿದೆ.
ಆಗಸ್ಟ್ 11 ರಂದು ನ್ಯೂಯಾರ್ಕ್‌ನ ಪೂರ್ವ ಜಿಲ್ಲೆಯ ಮ್ಯಾಜಿಸ್ಟ್ರೇಟ್ ನ್ಯಾಯಾಧೀಶ ಜೇಮ್ಸ್ ಆರ್ ಚೋ ಅವರಿಗೆ ಎಸ್‌ಇಸಿ ಸಲ್ಲಿಸಿದ ವಸ್ತುಸ್ಥಿತಿ ವರದಿಯಲ್ಲಿ, ನೋಟಿಸ್ ಜಾರಿ ಮಾಡುವ ಸಂಬಂಧ ಕಾನೂನು ದಾಖಲೆಗಳ ಗಡಿಯಾಚೆಗಿನ ವಿತರಣೆಯನ್ನು ನಿಯಂತ್ರಿಸುವ ಹೇಗ್ ಸೇವಾ ಸಮಾವೇಶದ ಅಡಿಯಲ್ಲಿ ಭಾರತದ ಕಾನೂನು ಮತ್ತು ನ್ಯಾಯ ಸಚಿವಾಲಯವನ್ನು ಸಂಪರ್ಕಿಸಿರುವುದಾಗಿ ತಿಳಿಸಿದೆ.

’ಉತ್ಪಾದನಾ ಸಂಬಂಧಿತ ಯೋಜನೆಗಳಿಗಾಗಿ’ ಒಪ್ಪಂದಗಳನ್ನು ಪಡೆಯಲು ಅದಾನಿ ಗ್ರೀನ್ ಎನರ್ಜಿ ಲಿಮಿಟೆಡ್‌ನ ಸಂಸ್ಥಾಪಕ ಗೌತಮ್ ಅದಾನಿ ಮತ್ತು ಅವರ ಸೋದರಳಿಯ ಕಂಪನಿಯ ಕಾರ್ಯನಿರ್ವಾಹಕ ನಿರ್ದೇಶಕ ಸಾಗರ್ ಅದಾನಿ ಅವರು ನೂರಾರು ಮಿಲಿಯನ್ ಡಾಲರ್ ಲಂಚವನ್ನು ಪಾವತಿಸಿದ್ದಾರೆ ಅಥವಾ ಭರವಸೆ ನೀಡಿದ್ದಾರೆ ಎಂದು ಎಸ್‌ಇಸಿ ಕಳೆದ ನವೆಂಬರ್‌ನಲ್ಲಿ ದಾಖಲಿಸಿದ ದೂರಿನಲ್ಲಿ ಆರೋಪಿಸಿತ್ತು.